Барселона се соочи со сериозни проблеми на почетокот на годината при обидите да го регистрира Дани Олмо за остатокот од сезоната, а кога се чинеше дека ситуацијата конечно е решена, Ла Лига подготви нов удар за Каталонците.
На крајот на минатата година, истече регистрацијата што Барселона ја имаше за Дани Олмо и Пау Виктор, а поради финансиските проблеми, Ла Лига не им дозволи на Каталонците да ја продолжат нивната регистрација.
Поради тоа, Олмо и Виктор пропуштија неколку натпревари во јануари, а дури откако Барселона поднесе жалба до ЦСД, овие играчи добија право на настап до крајот на сезоната.
Сепак, челниците на Ла Лига и голем дел од клубовите во првенството не можат да се помират со таа одлука и сметаат дека Олмо и Виктор не смееле да играат, бидејќи сè не било направено според правилата.
Претседателот на Ла Лига, Хавиер Тебас, порача дека сагата не е завршена и дека прават сè што можат за да ја поништат одлуката на Судот.
„Ги добивме документите за регистрација на Дани Олмо, но имавме одредени сомнежи во врска со една од компаниите кои изнајмиле седишта во ВИП ложата. Ја одобривме регистрацијата само откако видовме дека парите се уплатени на сметката на Барселона“, изјави Тебас.
Но, она што најмногу ги изненади навивачите на Барселона е изјавата на Тебас дека прави сè што може за Олмо и Виктор да го изгубат правото на настап оваа сезона.
„Моето лично мислење е дека Олмо не смее да ја заврши оваа сезона во првенството и дека регистрацијата наложена од ЦСД мора да биде поништена. ЦСД ја донесе одлуката за помалку од 24 часа и ние се жалевме на неа. Чекаме судски епилог“, додаде Тебас.
Познато е дека Барселона и Тебас немаат добри односи, а претседателот на Ла Лига не крие дека е навивач на Реал Мадрид.
Меѓутоа, дури и во Реал во последно време не го гледаат благонаклоно поради контроверзиите со судиите во Ла Лига.
Како и да е, во Барселона повторно стравуваат дека Олмо и Виктор би можеле да останат без регистрација за натпреварите во Ла Лига, што би бил огромен удар за тимот.
Конечниот исход од целата ситуација треба да биде познат следниот месец, кога ЦСД ќе се изјасни по жалбата поднесена од Ла Лига.
