Торино успеа да го совлада Милан со 2-1 во натпревар од 26. коло во Серија А, нанесувајќи им го шестиот пораз оваа сезона. За домаќините, во стартниот состав првпат се најде македонскиот репрезентативец Елиф Елмас, кој на теренот мина речиси еден час.
Дуелот започна со несреќна ситуација за „росонерите“, кога голманот Мајк Мењан и дефанзивецот Малик Тиао не се разбираа најдобро, што резултираше со автогол и предност за Торино од 1-0.
Мењан се обиде да расчисти, но топката се одби од неговиот соиграч и заврши во мрежата.
Милан веднаш реагираше и започна да врши притисок, создавајќи неколку шанси. Најдобрата ја имаше Кристијан Пулишиќ, кој во 32. минута не успеа да реализира пенал, откако Вања Милинковиќ-Савиќ маестрално го одбрани неговиот удар. На паузата, Торино замина со минимална предност.
Во вториот дел, Милан продолжи со нападите и конечно успеа да го најде патот до мрежата во 74. минута, кога Тијани Рајндерс со прецизен удар израмни на 1-1. Но, радоста на гостите траеше само две минути. Торино веднаш возврати преку Гвидас Гинеитис, кој погоди за конечни 2-1 и донесе голема победа за својот тим.
