Тренерот на Реал Мадрид, Карло Анчелоти, беше среќен по триумфот со 3-1 во реваншот против Манчестер Сити. Тој изјави дека неговиот тим ја покажал својата најдобра верзија во овој натпревар. Со оваа победа, „кралевите“ заслужено обезбедија место во осминафиналето од турнирот, но нивните амбиции се многу поголеми.
„Сакавме да победиме на овој начин, да ги повториме добрите моменти од првиот натпревар. Добро ја контролиравме топката и не му дозволивме на противникот да ја има во своја сопственост. Покажавме класа. Одигравме одличен натпревар. Момците знаеја што треба да направат и тоа го направија одлично. Оваа победа ќе нè направи уште посилни. Ја покажавме нашата најдобра верзија“, изјави Анчелоти.
Тој го пофали и стрелецот на хет-трикот, Килијан Мбапе.
„Сите го очекувавме овој хет-трик и тој се случи. Но, Мбапе не е нашиот единствен адут, имаме многу играчи кои можат да направат разлика. Победуваме со колективна работа“, додаде Италијанецот.
На крајот, тој го коментираше можниот противник во осминафиналето, или Атлетико Мадрид или Баер Леверкузен.
„Немам желби. Атлетико Мадрид и Баер Леверкузен се тешки противници и ги почитувам. Одигравме 10 натпревари за да стигнеме до осминафиналето, што беше повеќе од неопходно. Се надевам дека и оваа година ќе се претставиме добро“, изјави Анчелоти.
