Пеп Гвардиола призна дека малку си „поиграл“ со проценката дека Манчестер Сити има само „еден процент“ шанса да го елиминира Реал Мадрид во Лигата на шампионите.
Тимот на Гвардиола губи со 2-3 по првиот меч на „Етихад“, а во пресрет на реваншот во Мадрид, тренерот на Реал, Карло Анчелоти, се пошегува дека дури и Гвардиола не верува во својата претходна проценка.
„Излажав за еднопроцентната шанса. За првпат излажав“, рече насмеаниот Гвардиола.
„По 2-3 никој не ни даваше ниту толку. Ова не е најдобар резултат, но можеме да се носиме со тоа. Карло нема потреба да ми кажува ништо пред мечот“, истакна менаџерот на Сити.
Слабата форма на Сити во Премиер – лигата ги намалува очекувањата дека ќе успеат да го елиминираат Реал, но Гвардиола доби позитивни вести – Ерлинг Халанд се врати на тренинг по повредата на коленото од мечот со Њукасл (4-0).
Освен него, во тренинг кампот беа и Рубен Дијаш, Нејтан Аке и Џек Грилиш, кои го пропуштија дуелот со Њукасл.
„Патуваа со нас. Ќе видиме дали ќе играат, но добро е што се тука“, изјави Гвардиола.
За своите гостувања на „Сантијаго Бернабеу“, тој додаде: „Имам неверојатни спомени – некои многу добри, некои не толку. Но едно е сигурно – тука никогаш не е лесно.“
На прашањето како ќе се спротивстават на Реал, Гвардиола беше јасен:
„Треба да играме храбро, да бидеме свои. Мора да одиграме речиси перфектен натпревар, ако сакаме да го елиминираме Реал.“
