Тренерот на Аталанта, Џанпјеро Гасперини, го посочи Адемола Лукман како главен виновник за испаѓањето на тимот од Лигата на шампионите. „Бергамаските“ загубија на домашен терен од Бриж со 1-3, а нигерискиот напаѓач го постигна единствениот гол за својот тим на почетокот од второто полувреме, но подоцна промаши пенал.
„Лукман не требаше да го изведува пеналот, тој е еден од најлошите изведувачи на пенали што сум ги видел. Ретко погодува, дури и на тренинг. Ретеги и Де Кетеларе беа таму, но Лукман, во налет на ентузијазам по неговиот гол, реши да шутира од белата точка, и тоа воопшто не ми се допадна“, изјави бесниот Гасперини по натпреварот.
Лукман и претходно имал неуспеси при изведување на пенали, но оваа сезона Матео Ретеги промаши против Арсенал и Торино во натпревари што завршија 0-0, а Марио Пашалиќ не успеа да реализира во поразот од 1-2 против „биковите“.
Гасперини не го поштеди од критики ниту капитенот на Аталанта, Рафаел Толој, кој доби црвен картон во финишот на мечот откако физички се пресмета со Максим Де Кајпер од гостинскиот тим.
„Тоа беше грдо однесување. Никогаш не смееме да ги губиме нервите на ваков начин. Мораме да го напуштиме турнирот со кренати глави, бидејќи одигравме одлични натпревари против тимови како Реал Мадрид, Арсенал и Барселона“, подвлече Гасперини.
