Поразот од Вардар (0-2) му пресуди на досегашниот тренер на Работнички, Жикица Тасевски. Тој поднесе неотповиклива оставка на функцијата поради слабите резултати на „романтичарите“ во пролетниот дел од првенството.
„Поднесов неотповиклива оставка поради за мене неприфатливата ситуација во која се наоѓа мојот клуб. Работев, посветено, искрено секогаш подготвен за стручна анализа и одговорност за сопствените дела. Резултатски не бевме најдобри тоа треба да го признаеме, а кој го познава денешниот фудбалски поредок тоа секако ќе го разбере. Сакам да се заблагодарам на претседателот Драган Поповски и на директорот Иван Поповски за довербата и условите за работа кои ни беа овозможени. Им посакувам на сите во клубот многу среќа во продолжението на првенството. Ќе бидам најсреќен ако моето заминување биде пресвртница кон нови успеси достојни за клуб каков што е Работнички!“, изјави Жикица Тасевски за официјалниот сајт на ФК Работнички.
Тимот има три последовни порази во шампионатот и падна на шестата позиција на табелата со 31 бод.
