По пет години во репрезентативна пензија, Златан Ибрахимовиќ ќе го гледаме повторно во дресот на Шведска. Тој ќе се обиде да им помогне на помладите избраници на Јане Андерсон да стигнат до Светското првенство во Катар идната година, а има и големи шанси да настапи на Европското првенство во јуни.
Ибра на својот грб го носеше дресот со број „10“ цели 14 години, но сега сака да започне ново поглавје.
„Го замолив Александар Исак да ми го даде дресот со број „11“. Тој одговори, ‘Може, но да ми го вратиш за 6-7 години кога ќе се пензионираш’. Исто така, Емил Форсберг ми го понуди бројот „10“, но одбив. Ова е ново поглавје за мене, и мислам дека треба да го сменам бројот, иако тоа не значи ништо”, рече 39-годишниот напаѓач на Милан.
Инаку, Ибрахимовиќ ја почна својата репрезентативна кариера со Фудбалската репрезентација на Шведска до 21 година токму со бројот „11“, а подоцна забележа настапи со сениорите со истиот број, пред официјално да премине на „десетката“.
