Новиот тренер на Реал Мадрид, Чаби Алонсо, има јасна визија за засилување на средниот ред и како што пренесува „Дефенса Централ“, неговата најголема желба е ангажманот на Витиња, играчот за врска на ПСЖ.
Модриќ по завршувањето на Светското клупско првенство ќе го напушти клубот, ставајќи крај на блескавото 12-годишно поглавје на „Сантијаго Бернабеу“. Со 29 освоени трофеи, тој ќе замине како најтрофејниот играч во историјата на клубот. Се очекува да ја продолжи кариерата во Милан, неколку месеци пред својот 40. роденден.
Чаби Алонсо иднината ја гледа во португалскиот репрезентативец Витиња (25), кој настапува за ПСЖ и има договор до 2029 година. Сепак, реализацијата на трансферот ќе биде исклучително сложена. Претседателот на Реал Мадрид, Флорентино Перез, не е склон кон преговори со ПСЖ поради претходни затегнати односи – особено по сагата со Килијан Мбапе.
И покрај пречките, интересот на Алонсо е сериозен – Витиња се смета за идеален профил за реконструкција на средниот ред на „кралскиот клуб“.
