Раководството на Вест Хем му изгласа доверба на менаџерот Хулен Лопетеги, и покрај кошмарниот почеток на новата сезона во Премиер – лигата. „Чеканите“ ги загубија првите три домашни натпревари во сезоната за првпат во својата историја. Иако сè почесто се слушаат гласови против шпанскиот тренер, моментално тој не е загрозен од отказ и раководството на тимот смета дека тој треба да добие повеќе време за да го наметне својот стил на игра.
Лопетеги ужива добра репутација поради неговата работа во претходните клубови, особено во Севилја, Вулверхемптон и шпанската репрезентација. Ова лето, клубот беше многу активен на трансфер пазарот и го засили својот тим со квалитетни играчи, но и тие имаат потреба од време за да се прилагодат на околината и методите на работа на Шпанецот. Поради ова, тој сè уште не ја загубил довербата и ќе добие повеќе време за работа.
Вест Хем имаше тежок распоред на почетокот од сезоната, вклучувајќи натпревари против силни тимови како Манчестер Сити, Челси и Астон Вила, што може да го оправда слабото претставување во овие дуели.
