По разочарувачкото реми со Рајо Ваљекано во претходното коло, Барселона ја истури целата нервоза врз поранешниот голем ривал, Валенсија. На стадионот „Јохан Кројф“ вечерва се случи вистинска голеада и убедлива победа од 6-0. Столе Димитриевски остана на клупата за резерви кај Валенсија.
Првото полувреме мина во целосна доминација на каталонците. Топката постојано беше во нивна сопственост, а „лилјаците“ не упатија ниту еден удар кон голот на домаќините. Сепак, дисциплинираната одбрана на Валенсија издржа до 29. минута, кога по типична акција на Барса – брзо кружно додавање и пронајдена празнина – Феран Торес одлично проигра до Фермин Лопез, кој ја затресе мрежата за 1-0.
Во вториот дел на сцената стапија резервистите. Рафиња, кој влезе на полувремето, веќе во 53. минута зголеми на 2-0 по асистенција на Маркус Рашфорд. Само три минути подоцна, повторно блесна Фермин Лопез со убав удар со левата нога за 3-0.
Валенсија беше целосно изгубена, а Барса продолжи да ја казнува. Во 66. минута Рафиња уште еднаш се запиша во листата на стрелците за 4-0, а резервистот Роберт Левандовски со два гола во завршницата ја заокружи катастрофата. Најпрвин во 76. минута по додавање на Дани Олмо, а потоа и во 86. минута, по интервенција на ВАР кој ја исправи грешката на судијата, за конечни 6-0, најубедлив триумф оваа сезона во Ла Лига.
