Тренерот на Баерн Минхен, Томас Тухел, призна дека неговиот тим не го покажа најдоброто од себе на натпреварот против Галатасарај. Баварците победија со 1-3 во Истанбул и се лидери во групата А од Лигата на шампионите со вкупно девет бодови.
„Дали нашата победа е заслужена? Вистината е дека треба да бидеме задоволни што на полувремето не заостанувавме резултатски. Сепак, ако ја погледнеме нашата игра во вториот дел, нашиот успех е природен“, изјави Тухел.
„Во Лигата на шампионите никогаш не е лесно да се победи на гостински терен. Некогаш само треба да се најде начин да се дојде до трите бода, дури и ако играта не функционира“, потенцира тренерот на германскиот клуб.
„Горд сум што го водам овој тим. 37 натпревари без пораз и 16 последовни победи во групите од Лигата на шампионите е неверојатно достигнување. Важно е играчите секогаш да бидат мотивирани и да ги демонстрираат своите квалитети“, додаде Тухел.
