Израелскиот стратег Барак Бахар денеска беше претставен како нов тренер на Црвена Звезда. Тој ќе го наследи Милош Милојевиќ, кој освои двојна круна, но, сепак, не доби нов договор од српскиот шампион.
Барак потпиша договор на три години, а најави дека целта е да се обиде да направи исчекор со клубот во Европа.
„Дојдов во голем клуб, го знам менталитетот, подготвен сум да направам пробив во Европа“, рече тој. „Немаше да дојдам ако не мислев дека можам да успеам. Решив да го направам следниот чекор во кариерата. Навистина верувам во овој клуб. Ќе работиме напорно за да успееме. Можам да ви ветам дека ќе се обидеме да ја победиме секоја екипа, знам дека тука најважно е да го победиме Партизан, но јас сакам и европски пробив. Верувам во фудбалот, дека ќе играме позитивно, дека на навивачите ќе им се допадне нашиот напаѓачки фудбал“, истакна Барак Бахар.
