Тренерот на Академија Пандев, Југослав Тренчовски посакува натпревар без примен гол утре на премиерата на струмичани на европската сцена. Академија Пандев го очекува првиот натпревар против Зрињски од 1. квалификациско коло за Лигата на Европа во кој тим од БиХ ја носи фаворитската улога.
„Секако со нетрпение го очекуваме деби натпреварот за нашиот клуб во Европа. Дуелот со Зрињски е голем предизвик за нас од кој секако очекуваме позитивен резултат. Ја оставаме фаворитската улога на противникот, но знаеме и дека ако одиграме со срце и покажеме карактер можеме до победата. Нашата предност е тимската игра. Ако се прашувам јас, секој резултат без примен гол ќе биде добар за нас пред реваншот“ – истакна Тренчовски, кој вели и дека е познат составот со кој ќе истрча на утрешниот натпревар.
„Во голема мера познат е тимот за утрешниот натпревар, останаа само една или две дилеми: Темелков или Стојкоски, односно Велиновски или Миловановиќ. Се друго е познато“ – вели тренерот на Академија Пандев.
Дефанзивецот на Академија Пандев, Диме Димов, пак, вели дека целта на струмичани е што подолго останување на европската сцена ова лето.
„Максимално го почитуваме противникот. Може да ја препуштиме фаворитската улога на Зрињски но тоа не теренот ништо не значи. Наша цел е што подолго да останеме на европската сцена и достојно да го претставиме македонскиот фудбал. Верувам дека тоа ќе биде јасно видливо уште на утрешниот натпревар против босанскиот тим“ – вели Димов.
Натпреварот меѓу Академија Пандев и Зрињски на националната арена „Тодор Проевски“ во Скопје се игра утре со почеток од 19 часот.
