Менаџерот на Манчестер Јунајтед, Ерик тен Хаг, зборуваше по победата на “црвените ѓаволи” со минимални 1-0 против тимот на Фулам во натпреварот од првото коло на англиската Премиер – лига. Единствениот гол го постигна Џошуа Зиркзе, кој влезе како замена во 61. минута.
„Замените секогаш се важни. Беше одлично да се види играч кој влегува од клупата и го постигнува победничкиот гол. Сите гледаат колку се важни резервните играчи. Тие треба да бидат подготвени. Постигнувањето голови е важно за еден напаѓач. Зиркзе има многу квалитети, треба да најде вистинска рамнотежа меѓу нив. Треба да влегува во казнениот простор за да ја вметнува топката, но сакаме и да се вклучува во нападите. Имаме неколку одлични играчи од средниот ред кои играат покрај него и можат да учествуваат во комбинациите”, изјави Тен Хаг.
Менаџерот на победничкиот тим исто така изнесе и неколку критики, намекнувајќи дека неговиот тим не требало да чека до толку доцна во натпреварот за да тргне во потрага по победа.
„Против Фулам секогаш е тешко да се игра, но ние притискавме навистина добро и ги држевме под притисок. Создадовме многу шанси и требаше да постигнеме гол порано. Единствената моја забелешка е што можевме да ја завршиме работата порано. Кога имаме постојана одбрана со четири играчи, ние се браниме интелигентно со висок пресинг, а средниот ред и крилните играчи можат да одат напред. Но, ако нема стабилност во одбраната, тогаш настануваат проблеми”, додаде Тен Хаг.
На крајот, Холанѓанецот зборуваше и за Џејдон Санчо, чие отсуство предизвика некои шпекулации.
„Џејдон имаше инфекција на увото оваа недела и не беше 100 % подготвен да излезе на теренот. Воопшто, можеше да игра, но ние го донесовме тоа решение”, заврши Тен Хаг.
