Стефан Ристовски, капитенот на Динамо Загреб, одигра клучна улога во ремито против Селтик (0-0) на „Максимир“ во шестото коло од Лигата на шампионите. Динамо сега има осум бода, а преостануваат уште два натпревари во групната фаза, гостување кај Арсенал во јануари и дуел со Милан на домашен терен. За пласман во нокаут-фазата, тимот веројатно ќе треба да освои три, а можеби и само два бода.
Ристовски не се согласува дека Динамо е во криза, иако не им оди најдобро во домашното првенство.
„Знаете ли колку поени имаме во Лигата на шампионите? Прелесно го отпишувате Динамо. Ова е единствениот клуб кој ја претставува државата во Лигата на шампионите. Кога победуваме, сите се со нас. Кога губиме, тогаш се зборува за криза. Што се однесува до повредите, ова е навистина најтешкиот период. Нешто се случува, но нема време за жалење. Мора да гледаме кон иднината и да се бориме“, истакна Ристовски.
По натпреварот со Селтик, тој го коментираше продолжението на сезоната.
„Остануваат уште два натпревари во Лигата на шампионите, но фокусот е на ХНЛ. И покрај сите проблеми, нема да се предадеме. Кога нè понижуваат и отпишуваат, тогаш Динамо е најсилен! Така ќе биде и овојпат“, изјави македонскиот интернационалец.
