Дерби натпреварот од Втората фудбалска лига на Македонија меѓу Воска Спорт и Пелистер е одложен за следната среда (22 март), затоа што викендов во Охрид фокусот ќе биде насочен на средбата меѓу претседателите на Србија и на Косово, Александар Вучиќ и Албин Курти.
„Ве известуваме дека по барање на Министерството за Внатрешни работи и СВР Охрид комисијата за натпревари на ФФМ направи промена на терминот за во среда 22.03.2023 година“, се вели во објавата на битолскиот клуб.
Припадниците на МВР ќе бидат преокупирани со обезбедувањето на политичката средба, па достави известување до Фудбалската федерација на Македонија да одреди друг термин за одигрување на второлигашкото фудбалско дерби.
Воска во моментов е второпласирана на табелата во Втората лига со 47 бода, два помалку од лидерот Вардар, додека Пелистер е на четвртата позиција на табелата со 43 бода.
