Лучано Спалети беше отпуштен од селекторската позиција во италијанската репрезентација, но можеби нема долго да остане без ангажман. Тој добил примамлива понуда од 18 милиони евра по сезона да го преземе кормилото на Ал-Наср, каде што би го заменил својот сонародник Стефано Пиоли.
Спалети беше разрешен поради катастрофалниот старт во квалификациите за Светското првенство. „Аѕурите“ загубија со 0-3 од Норвешка во Осло, а потоа со мака ја совладаа Молдавија со 2-0.
Според информациите, од Ал-Наср стапиле во контакт со Спалети уште во неделата, ден пред натпреварот со Молдавија и само неколку часа откако стана јасно дека тој нема да остане селектор.
Понудата вклучува двегодишен договор со годишна плата од 18 милиони евра. Спалети сè уште не донел конечна одлука, но понудата е навистина примамлива. Во Ал-Наср, тој би соработувал со Кристијано Роналдо.
Што се однесува до Стефано Пиоли, тој планира враќање во Италија, а како најверојатна нова дестинација се споменува Фиорентина.
