Тренерот на Интер, Симоне Инзаги, ќе направи ротации за утрешниот натпревар против Лацио во четвртфиналето од Купот на Италија. Тој ќе се обиде да одмори некои од своите клучни играчи за дербито на врвот во Серија А против Наполи во сабота. Сепак, стратегот ќе се обиде да избере доволно силен состав кој ќе може да се справи со римјаните.
Се очекуваше јануарското засилување Никола Залевски да биде меѓу стартерите, но полскиот фудбалер заработил повреда на листот на тренинг и ќе го пропушти натпреварот. Јан Зомер, Маркус Турам, Карлос Аугусто и Хоакин Кореа сигурно нема да бидат во составот. Францускиот напаѓач се надева дека ќе се опорави за дуелот со Наполи.
Стефан Де Фрај најверојатно ќе го замени Франческо Ачерби, додека Јан Бисек се очекува да влезе во одбраната наместо Алесандро Бастони.
Пјотр Зиелински најверојатно ќе стартува наместо Хенрих Мхитарјан, а Давиде Фратези ќе биде во почетниот состав на местото на Николо Барела. Можно е Хакан Чалханоглу да започне од првата минута, откако беше резерва против Џенова. Во нападот, Марко Арнаутовиќ и Мехди Тареми се очекува да бидат стартери, додека Лаутаро Мартинез ќе остане на клупата.
