Македонскиот прволигаш Шкупи остана без шефот на стручниот штаб Умит Каран. Од клубот од Чаир велат дека не се остварени зацртаните цели од стартот на сезоната, иако Шкупи се наоѓа на второто место со шест бода негатива во однос на лидерот Шкендија.
„Шкупи го раскина договорот со Умит Каран. Ја почнавме сезоната со големи амбиции, а второто место по завршувањето на есенската полуетапа не е тоа што го посакувавме. Амбициите и целите на клубот се поголеми и поради тоа одлучивме да ни се разделат патиштата со Умит Каран. Раководството на клубот сега ќе се фокусира кон ангажман на нов шеф на стручниот штаб и откако ќе биде пронајден нов тренер, името ќе биде обеледенето во јавноста. Клубот му се заблагодарува на Умит Каран за напорната и коректна работа и му посакува се најдобро во кариерата“, се вели во соопштението на ФК Шкупи објавено на официјалниот клупски сајт.
