Шкупи го победи Вардар, Шкендија едвај со Пелистер, Силекс го освои Ѓорче

Шкупи го совлада Вардар со 2-0 во градското дерби кое се одигра на комплексот на ФФМ. Тимот на Хасан Озер беше подобар ривал и славеше со головите на Региналдо во 28.минута и на Филип Глигоров во 65.минута од дуелот. Посебно убав беше вториот погодок за Шкупи на Глигоров. Тој распали од 25 метри со левата нога и погоди во горниот агол од голот на Филип Илиќ.

Вардар имаше шанса преку Мирчевски, но крилниот напаѓач шутираше непрецизно.

Шкендија едвај го скрши отпорот на Пелистер и го совлада во Тетово со 1-0. Стрелец на победничкиот гол беше Валмир Нафиу во 88.минута. Тој се снајде одлично по центаршутот од левата страна, одбраната на гостите ја пропушти топката, а тој шутираше под гостинскиот голман.

Силекс ја совлада Македонија ЃП во Ѓорче Петров со 0-3. Дејан Тантуровски во 42.минута донесе водство за кратовци, Ивановски зголеми на 0-2 во 77.минута, а Македонија ЃП која играше и со фудбалер помалку на крајот доживеа убедлив пораз, а точка стави повторно Тантуровски.

Борец ја совлада Беласица со 1-0, со голот на Еди Баша во 55.минута од дуелот. Тоа се многу важни три бода за тимот на Борче Христов.

Струга Трим Лум и Ренова ремизираа без голови. Гостите од 42.минута играа со фудбалер помалку поради исклучувањето на Арбен Тафа.

Вчера, Академија Пандев славеше против Работнички со 0-2 на арената „Тодор Проески“.

ПРВА ЛИГА, 23 КОЛО – РЕЗУЛТАТИ

ШКЕНДИЈА – ПЕЛИСТЕР 1-0

ШКУПИ – ВАРДАР 2-0

МАКЕДОНИЈА ЃП – СИЛЕКС 0-3

БОРЕЦ – БЕЛАСИЦА 1-0

СТРУГА ТЛ – РЕНОВА 0-0

ВЧЕРА: РАБОТНИЧКИ – АКАДЕМИЈА ПАНДЕВ 0-2