Шкендија го декласира Вардар, Шкупи скијаше во Кратово, Беласица освои бод со Работнички

Шкендија го декласира Вардар со 1-6 на националната арена „Тодор Проески“ и најави црни денови за најтрофејниот македонски клуб. Шкупи во снежна атмосфера го совлада Силекс во Кратово со 1-3 и ја продолжува трката за титулата, а и Македонија ЃП оствари триумф (1-2) против Ренова.

Академија Пандев го совлада составот на Струга Трим Лум со 1-0, а Беласица и Работнички ремизираа 1-1. Утре се игра дуелот меѓу Борец и Пелистер.

Мартин Мирчевски во десеттата минута донесе изненадувачка предност за Вардар, но тоа само ја налути Шкендија. Флорент Рамадани израмни во 27.минута, а Бесарт Ибраими од пенал се погрижи за пресврт во 34.минута. Во вториот дел вистински дебакл за Вардар.

Бесарт Ибраими во 49.минута и Љупчо Дориев во 55.минута го потврдија триумфот на Шкендија, а до крајот стрелаа и Рубин Хебај и Дашмир Елези за конечни 1-6.

шкупи славеше со 1-3 против Силекс во Кратово. Ристе Каракамишев во снежни услови го доведе Силекс во водство во 15.минута, но израмни Абдул Руатубјаје во 38.минута. Ламине Дијак погоди за 1-2 во 71.минута, а осум минути подоцна Тимовски заработи црвен картон и Силекс остана со играч помалку. На крајот, Региналдо во 88.минута го постави конечниот епилог.

Академија Пандев оствари важен триумф славејќи со 1-0 против Струга Трим Лум. Стрелец на победничкиот гол беше Кристијан Велиновски во 29.минута, а Коста Манев во завршницата заработи црвен картон.

Македонија ЃП славеше со 1-2 против Ренова во Тетово. Шефит Шефити во 16.минута донесе предност за „гипсарите“, израмни Филип Алексовски во 36.минута, а Чарлестон да Силва во 90. минута погоди за триумф на „лавовите“.

Беласица и Работнички ремизираа 1-1. „Романтичарите“ пропуштија безброј шанси, а од пораз ги спаси Петар Петковски во 89.минута. Беласица поведе со голот на Бесар Гуџуфи во 18.минута.