Во вчерашниот натпревар од 14. коло на англиската Премиер – лига, Ливерпул и Њукасл одиграа 3-3. Мохамед Салах постигна два гола и даде асистенција во овој дуел, што му донесе и рекорд во елитното англиско натпреварување.
Египетскиот напаѓач на Ливерпул по 37. пат во својата кариера во најсилниот ранг на англискиот фудбал постигнал гол и имал асистенција на истиот натпревар.
Досега рекордот го делеше со Вејн Руни, кој тоа го направил 36 пати. Руни го држеше рекордот од јануари 2016 година.
За новиот рекорд, на Салах му беа потребни 214 натпревари помалку од што му биле потребни на легендарниот стрелец на Манчестер Јунајтед и Евертон, Вејн Руни.
Целата кариера во Англија, Мохамед Салах ја помина во Ливерпул, за кој има одиграно вкупно 370 натпревари, постигнато 226 голови и забележано 101 асистенција. Оваа сезона е водечки стрелец (13) и втор асистент (8) на натпреварувањето.
Руни е најдобар стрелец во историјата на Манчестер Јунајтед со 253 голови од 559 натпревари. Во дресот на големиот клуб од „Олд Трафорд“, тој реализирал и 139 асистенции.
