Легендарниот бразилски фудбалер Роналдо објави дека се повлекува од трката за претседател на Фудбалската федерација на Бразил, откако не успеа да обезбеди доволно поддршка од регионалните федерации за да ја поднесе својата кандидатура.
48-годишниот поранешен напаѓач, двократен светски шампион и добитник на „Златната топка“, во декември ја изрази својата намера да се кандидира со цел да го „врати престижот и почитта што Бразил секогаш ги имал“, по години контроверзии во управувањето со бразилскиот фудбал.
Сепак, поранешниот играч на Барселона, Интер и Реал Мадрид заклучи дека нема да може да му се спротивстави на актуелниот претседател Едналдо Родригес, кој ја има речиси целосната поддршка од оние што имаат право на глас.
„При мојот прв контакт со 27-те регионални федерации, наидов на 23 затворени врати. Ако мнозинството од луѓето кои носат одлуки веруваат дека бразилскиот фудбал е во добри раце, тогаш нема значење што мислам јас“, изјави Роналдо преку своите социјални мрежи.
Тој истакна дека федерациите одбиле да го сослушаат неговиот проект и дека не постоела волја за дијалог.
„Федерациите одбија да ме примат под изговор дека се задоволни од тековната администрација и ја поддржуваат реизборната кампања на Родригес. Не успеав да го претставам мојот проект, да ги изложам моите идеи и да ги слушнам нивните мислења. Статутот им дава најголема тежина на гласовите на федерациите, што значи дека немам реални шанси за кандидатура“, додаде Роналдо.
На изборите за претседател на ФФБ, 27-те регионални федерации имаат по три гласа, 20-те клубови од Серија А по два, а 20-те екипи од Серија Б – по еден. Со оглед на тоа што повеќето регионални лидери го поддржуваат Родригес, тој најверојатно ќе биде единствениот кандидат на изборите во 2025 година.
