Фудбалерот на Манчестер Сити, Родри, стана уште еден високо профилиран играч кој зборува за сè поголемиот товар врз фудбалерите, што може да доведе до нивна реакција. Слично мислење изрази и голманот на Ливерпул, Алисон Бекер, а во фудбалските кругови сè повеќе се зборува за можен штрајк на играчите.
Ова се случува непосредно пред првите натпревари од главната фаза на Лигата на шампионите, каде новиот формат носи уште поголем број на натпревари во една сезона.
Запрашан дали фудбалерите се подготвени да штрајкуваат поради пренатрупаниот календар, Родри одговори:
„Блиску сме до тоа. Тоа е општо мислење меѓу играчите и ако продолжи вака, нема да имаме друг избор. Ова е нешто што навистина нѐ загрижува. Ние сме оние кои страдаат.
Од сопствено искуство можам да кажам дека 60 или 70 натпревари во сезона се неприфатливи. Оптималниот број на натпревари е меѓу 40 и 50, по што формата опаѓа бидејќи не можеме да го одржиме физичкото ниво. Оваа сезона можеби ќе стигнеме до 70 или 80 натпревари. Според мене, тоа е премногу. Некој треба да се грижи за нас бидејќи ние сме главните актери во овој спорт, или бизнис, како и да го наречете. Но, сè се сведува на пари или маркетинг. Се работи за квалитетот на шоуто. Кога не сум уморен, играм подобро, и ако сакаат подобар фудбал, треба да ни овозможат одмор“, рече Родри.
Тој исто така изрази задоволство од постигнувањата минатата година со Манчестер Сити и со репрезентацијата, нагласувајќи дека индивидуалните признанија се резултат на тимската работа.
