На македонските фудбалски терени викендов нема да се играт натпревари, откако поради локалните избори што ќе се одржат утре, сѐ е одложено.
Активностите ќе продолжат во вторник и среда (21 и 22 октомври), кога на програмата се пет осминафинални натпревари од Купот на Македонија. Вардар и Работнички ќе бидат домаќини во овие дуели, но двата тима нема да играат на националната Арена „Тодор Проески“.
Причината е состојбата на теренот, кој мора да се заштити и подготви за европскиот натпревар на Шкендија. Тетовци во четврток ќе го пречекаат ирскиот Шелбурн во второто коло од Конференциската лига на УЕФА.
Во наредните денови на Арената ќе се спроведуваат активности за одржување и заштита на тревникот, особено поради дождливите услови, за да се спречи дополнително оштетување. Затоа, скопските клубови ќе мора да побараат алтернативни терени: Работнички во вторник ќе ја пречека Брегалница на стадионот во Автокоманда, додека Вардар ден подоцна ќе биде домаќин на Новаци на теренот на ФФМ.
