Кол Палмер продолжува да импресионира со своите настапи за Челси оваа сезона, каде што се истакнува како еден од најдобрите играчи во Премиер – лигата. Дваесет и двегодишниот офанзивен играч за врска постигна 11 голови и забележа шест асистенции, со што се најде на третото место во лигата според овие параметри. Овие резултати следат по блескавата претходна сезона, во која забележа 22 гола и 11 асистенции, а беше и клучен играч за Англија во походот кон финалето на Европското првенство.
Како што пренесува „Фичајес“, претседателот на Реал Мадрид, Флорентино Перез, внимателно го следи развојот на Палмер и е подготвен да започне преговори уште оваа зима. Според извештаите, Реал Мадрид е подготвен да понуди најмалку 100 милиони евра, бидејќи Челси не би се согласил на помала сума за еден од своите најперспективни играчи.
Палмер пристигна во Челси во есента 2023 година од Манчестер Сити за 47 милиони евра, откако ги помина сите младински категории на „граѓаните“. Иако доби шанса во првиот тим на Пеп Гвардиола, каталонскиот тренер им даде предност на други играчи, што го натера Палмер да побара нова можност во Челси, каде што блеска со своите настапи.
Челси гледа огромен потенцијал во Палмер, не само како еден од најдобрите играчи во лигата, туку и како идол кој може да стане светска мегазвезда. Реал Мадрид, пак, во него гледа идеален играч за долгорочно засилување на својот состав.
