Германскиот селектор Јоаким Лев има сериозни проблеми во пресрет на Европското првенство. Тиражниот „Билд“ пишува дека репрезентативците се незадоволни од формацијата што селекторот Јоаким Лев има намера да ја искористи на ЕП. Тој планира да игра во формација 3-5-2 на Европското првенство, а тоа не им одговара на фудбалерите на Баерн Минхен. Тие сметаат дека Германија треба да игра со четворица играчи во последната линија.
Другите соиграчи исто така ги поддржуваат фудбалерите на Баерн. Повеќето сметаат дека репрезентацијата би изгледала подобро со четворица играчи во одбраната.
Баерн го дава костурот на германската репрезентација. На списокот се Мануел Нојер, Никлас Суле, Серж Гнабри, Леон Горецка, Шошуа Кимих, Томас Милер и Лерој Сане.
Лев наиде на голем отпор пред самиот старт на ЕВРО, а односите во селекцијата не се добри уште од поразот против Македонија (1-2) во квалификациите за СП во Катар. За Лев ова се последните денови на клупата на Германија. Него ќе го наследи поранешниот тренер на Баерн, Ханси Флик.
Германија на ЕП е во „групата на смртта“ заедно со Франција, Португалија и со Унгарија.
