Рафаел Бенитез е во Атина. Легендарниот шпански тренер пристигна заедно со својот стручен штаб за да ги финализира деталите со Панатинаикос, а официјалното претставување е закажано за сабота – само еден ден пред дуелот против Астерас Триполис во Суперлигата.
За 65-годишниот стратег ова е 17. тренерски ангажман во кариерата и прв по речиси две години пауза. Бенитез е без работа од март 2024, кога замина од Селта Виго, а сега се враќа со договор на две години и плата од 4 милиони евра по сезона – рекорд во грчкиот фудбал.
Извори блиски до клубот откриваат дека Бенитез го кажал своето „да“ по разговор со претседателот Јанис Алафузос во Лондон, а сега се очекува да ја врати големата слава на клубот од Атина.
Панатинаикос моментно е на седмото место во Суперлигата, со осум бода заостанување зад лидерот ПАОК, а навивачите со нетрпение го очекуваат својот нов тренер да го врати тимот на врвот, како во Грција, така и во Европа.
