Челси е презадоволен од настапите на Жоао Феликс, кој во јануари пристигна на позајмица од Атлетико Мадрид. Лондончани сакаат трајно да го задржат Португалецот, но во договорот меѓу двата тима нема откупна клаузула и се очекува преговорите да бидат сериозно тешки. Затоа, Англичаните најверојатно ќе вклучат фудбалер како дел од зделката, а тоа најверојатно ќе биде Кристијан Пулишиќ, кој е непотребен на „Стемфорд Бриџ“.
Атлетико Мадрид плати 127 милиони евра на Бенфика за правата на Феликс во 2019 година. „Јорганџиите“ ќе сакаат да вратат колку што е можно повеќе од таа инвестиција, со оглед на тоа што играчот има само 23 години и сѐ уште е многу ценет во Европа. Затоа се очекува да постават цена од околу 100 милиони евра.
Сепак, Челси не сака да ја плати таа сума, па ќе се обиде да ја намали со вклучување на Кристијан Пулишиќ како дел од трансферот.
Откако е во Челси, Жоао Феликс има постигнато два гола на 11 одиграни натпревари во сите натпреварувања. На зима интерес за него имаше и од Манчестер Јунајтед, кој исто така може да се обнови на лето, па Челси брза да се договори со Атлетико Мадрид за да ги престигне „црвените ѓаволи“.
