Францускиот гигант Пари Сен Жермен ја одби и втората понуда на Реал Мадрид за трансфер на Килијан Мбапе на „Сантијаго Бернабеу“. Раководството на „светците“ одлучи да ризикува и да го задржи напаѓачот на „Паркот на принцовите“ иако тој следното лето би можел да замине како слободен агент. Но, сепак, ПСЖ ќе продолжи во наредниот период да го убедува Мбапе да стави потпис за нова соработка.
Реал Мадрид понуди 170+10 милиони евра за ангажман на Мбапе, а ПСЖ смета дека и тоа е недоволно за да дозволи да ја загуби француската ѕвезда. Од друга страна, „кралевите“ дадоа ултиматум дека ова е последната понуда од Мадрид ова лето по што станува јасно дека Мбапе ќе остане во Париз и оваа сезона.
