Напаѓачот на Борусија Дортмунд, Ерлинг Халанд, ќе отсуствува од теренот на неодредено време поради проблеми со мускулот, соопшти денеска неговиот клуб.
Халанд мораше да излезе во 63. минута од саботниот натпревар против Хофенхајм (3:2), а потоа се чинеше дека ги повреди препоните. Во текот на натпреварот лекарите му помогнаа поради проблемот со десното колено.
„Халанд има мускулни проблеми кои бараат третман и подетални прегледи во наредните денови“, се наведува во соопштението на клупската веб-страница.
Ова е третпат оваа сезона Халанд да оди на пауза поради здравствени проблеми. Тој пропушти три натпревари од крајот на септември до средината на октомври поради проблеми со колкот, а потоа седум меча од крајот на октомври до крајот на ноември поради други повреди.
Халанд оваа сезона постигна 16 гола на 14 натпревари во Бундес – лигата.
