Досегашниот тренер на Ајакс, Франческо Фариоли, е нов тренер на Порто, објави португалскиот гигант. Италијанецот потпиша договор на две години.
Фариоли, кој има само 36 години, е релативно непознат на пошироката фудбалска јавност. Минатото лето изненадувачки го презеде Ајакс и успеа да ги врати добрите резултати на тимот, но на крајот несреќно ја испушти титулата на драматичен начин.
Младиот стручњак често е споредуван со својот сонародник Роберто Де Зерби поради офанзивниот стил на игра кој го негува. Сега во Порто ќе го наследи Мартин Анселми, кој беше назначен во јануари, но си замина по елиминацијата на тимот во групната фаза на Светското клупско првенство.
Целта на Фариоли ќе биде да го врати Порто на врвот на португалскиот фудбал, откако тимот нема освоено титула веќе три години.
