Италијанскиот првак Јувентус го доби дерби натпреварот против Наполи со 2-0 и малку е сега полесна ситуацијата на тренерот Андреа Пирло. Интер побегна многу на врвот на табелата и „старата дама“ многу веројатно ќе мора да го предаде „скудетото“, но сега целта на клубот е да избори пласман во Лигата на шампионите.
Со триумфот над „наполитанците“, Јувентус се смести на третата позиција и може помирно да го игра продолжението од шампионатот во Серија А.
„Ни беше потребна една ваква победа. Не бегам од одговорноста никогаш, сите тренери зависат од резултатите. Но, во моментот имаме и многу други грижи, борба со коронавирусот, со повредите. Верувам дека овој тим на Јувентус може многу повеќе и факт е дека потклекнавме во одреден дел од сезоната. Но, тоа ќе го анализираме откако ќе заврши сезоната. Сега треба да издржиме и да ја оствариме целта“, изјави Андреа Пирло.
