Турскиот сопственик Олгун Ајдин го повлече сидрото и си замина од Шкупи. Тој вчера организирал проштална вечера со вработените во клубот и се повлекува од клубот од Чаир.
Откако загуби од Вардар, Олгун Ајдин излезе со порака дека во Македонија сѐ се одвива со политичка поддршка и одлучи да замине, иако само неколку месеци претходно најавуваше бајки на прес-конференција во хотелот „Хилтон“, дека за Шкупи ќе изгради комплетна база за тренинг, а чека дозвола од македонската влада.
Олгун Ајдин го презеде клубот ФК Шкупи како спонзор во 2018 година, а веќе во првата сезона обезбеди излез во Европа. Во 2022 година Шкупи беше шампион на Македонија, но оттогаш не му оди најдобро и сега реши да се повлече.
После еден ваков потег, во иднина дефинитивно треба многу посериозно да се разгледуваат потенцијалните инвеститори и спонзори во македонскиот фудбал, посебно оние кои доаѓаат од странство. Повлекување среде сезона е во најмала рака скандалозен потег.
