Најдобриот македонски фудбалер Горан Пандев и официјално ќе игра уште една сезона во дресот на италијанскиот калчолигаш Џенова. Тој ја продолжи верноста до јуни 2022 година и ќе биде дел од тимот и во претстојната сезона од Серија А.
Македонскиот фудбалер е во Џенова од 2015 година, а во дресот на „грифините“ одигра 156 натпревари во Серија А и постигна 28 гола. Во италијанската елитна лига одигра вкупно 473 натпревари и постигна 101 гол.
Пандев, кој претходно играше и за Интер и за Наполи, е третиот странец во Серија А кој постигнал повеќе од 100 голови и еден од петте играчи кои моментно играат во лигата.
Пандев размислуваше за комплетно пензионирање, но, сепак, се уште може да игра на врвно ниво, а најголемата желба му е да се збогува од фудбалот со публика на стадионите.
Пандев летово стави крај на репрезентативната кариера откако му се исполни желбата да настапи со Македонија на Европско првенство.
