ФИФА објави дека квалификациите во Африка за Светското првенство во 2022 година, планирани да се одржат во јуни, ќе бидат одложени за наесен годинава и следната пролет, поради пандемијата на коронавирусот.
„ФИФА може да потврди дека одлучи, заедно со Африканската фудбалска асоцијација, да ги одложи мундијалските квалификации за Африка, поради тековните проблеми предизвикани од пандемијата на Ковид-19 и желбата да се обезбедат оптимални услови за игра“, соопшти Светската фудбалска организација.
Ова е второ одложување на овие квалификации што требаше да се одржат во октомври минатата година. Одложените натпревари ќе се играат во периодот на меѓународни термини во септември, октомври и ноември оваа година и во март следната година.
54 репрезентации се натпреваруваат во африканските квалификации, а се борат за пет места на Светското првенство што ќе се одржи во Катар 2022 година.
