Бразилскиот напаѓач Нејмар го раскина договорот со саудискиот Ал-Хилал, вреден 100 милиони евра годишно, и потпиша за својот клуб од младоста, Сантош. Во Бразил го пречека стадион полн со навивачи кои го извикуваа неговото име. Атмосферата го расплака бразилскиот офанзивец, а сега веќе го одработи и првиот тренинг за Сантош.
Нејмар привлече големо медиумско внимание со своето пристигнување на тренинг. По 12 години, на бразилските терени се врати со хеликоптер. Неговите соиграчи наводно се фатиле за глава кога виделе дека Нејмар пристигнува со хеликоптер.
Да потсетиме, неодамна тренерот на Ал-Хилал, Жорге Жесус, потврди дека клубот нема да го регистрира Нејмар (32) за вториот дел од првенствената сезона во Саудиска Арабија.
„Тој повеќе не може да игра на нивото на кое сме навикнати“, изјави Жесус. Скапоплатениот бразилски напаѓач ќе имаше право да настапува само во азиската Лига на шампиони.
Нејмар ја започна кариерата како играч на Сантош, а од 2013 до 2017 година играше за Барселона, со која освои сè што можеше. Во трансфер вреден 222 милиони евра во 2017 година се пресели во Пари Сен Жермен, со кој пет пати стана шампион на Франција, пред минатата година да биде доведен од Ал-Хилал за 90 милиони евра.
Повредата на лигаментите е причината поради која за клубот од Саудиска Арабија одигра вкупно само седум натпревари. Во својата кариера, за клубовите и за репрезентацијата, постигна 439 голови на официјални натпревари.
