Потпретседателот на Јувентус и поранешен ас на клубот од Торино, Павел Недвед, го коментираше претстојното заминување на аргентинската ѕвезда, Пауло Дибала. 28-годишниот напаѓач не го прифати предлогот за нов договор со плата од 7 милиони евра по сезона наместо посакуваните најмалку 11 милиони и ќе замине како слободен агент по завршувањето на сезоната.
„Внимателно проучувавме што ни дава Дибала на теренот и надвор од него, каков е неговиот придонес во нашиот проект. Тој е одличен фудбалер, но има и високи барања кои не можеме да ги исполниме. Така нашите патишта се разминуваат, но тоа не значи дека тој не е голем играч“, изјави Недвед.
Оваа сезона Дибала одигра 37 натпревари за Јувентус во сите натпреварувања, постигнувајќи 15 гола и шест асистенции.
