Тренерот Џулијан Нагелсман и капитенот Мануел Нојер веруваат дека Баерн Минхен е еден од фаворитите за освојување на трофејот во Лигата на шампионите оваа сезона. Баварците го започнуваат годинешното натпреварување со гостувањето кај Интер вечерва во групата Ц.
„Баерн секогаш треба да биде меѓу фаворитите. Но, тоа мора да се покаже на теренот, а не со разговор“, рече Нагелсман на прес-конференцијата пред натпреварот.
Германскиот шампион минатата година шокантно испадна во четвртфиналето од Вилјареал и голманот Мануел Нојер не го заборави тој пораз.
„Ние сме еден од фаворитите. Не стигнавме до крајот во последните две сезони и ќе се обидеме да го направиме тоа сега. Поразот од Вилјареал се уште боли“, изјави Нојер.
Баерн за мечот со Интер ќе може да смета на најдобрите. Во тимот се враќа искусниот Томас Милер, кој беше одморен за саботното гостување кај Унион Берлин (1-1). Дефанзивецот Лукас Хернандез и играчот за врска Леон Горецка се враќаат во тимот по закрепнувањето од повредите.
„Генерално сум свесен за составот, но имам и неколку прашалници. Конкуренцијата во составот е на ниво и тоа ни овозможува да направиме промени без да загубиме на квалитет“, изјави Нагелсман.
