Селекторот на Турција, Винченцо Монтела, е свесен дека без капитенот Хакан Чалханоглу и дефанзивецот Самет Акајдин ќе треба да направи чуда со својот состав за да го добие осминафиналниот натпревар вечерва против Австрија, која според него е најдобриот тим на ЕВРО 2024. Последниот натпревар на Турција против Чешка беше многу оспоруван, а играчите на Монтела добија дури 11 жолти картони.
Чалханоглу и Акајдин се суспендирани за вечерашниот натпревар поради акумулирани жолти картони.
„Секогаш сакам секој да биде на располагање за поширок избор. Ќе останеме без двајца играчи, а тие се незаменливи. Секако, тоа малку ме загрижува, но верувам дека ќе има други кои се подготвени да ги заменат и да ја завршат својата работа“, изјави турскиот селектор.
Монтела го посочи офанзивното претставување на тимот во групната фаза како причина за оптимизам. Турските репрезентативци постигнаа пет гола преку пет различни играчи. Ниту еден од головите не беше автогол или од пенал. Турција е исто така на трето место по вкупен број удари во просек на натпревар – 16,67.
Сепак, поранешниот напаѓач на Рома знае колку силен противник е Австрија. Тимот ја совлада Турција со 6-1 во пријателски натпревар во март и ја предводеше својата група на Европското првенство, вклучувајќи ги Франција, Холандија и Полска.
„Тие се комплетен тим, можеби најдобриот тим. Тие се тим кој многу агресивно игра висок пресинг на теренот, многу доследно, и се одлични при преминот во различни фази на играта. Ме потсетуваат на клупски тим, бидејќи се способни да се справат со сите различни ситуации во натпреварот“, потенцира Монтела.
Тој се надева на уште еден голем натпревар од Арда Ѓулер, кој стана најмладиот играч кој постигнал гол при дебито на Европско првенство на 19 години и 114 дена – рекорд што претходно му припаѓаше на Кристијано Роналдо.
„Тој е многу талентиран и тоа го гледаат сите. Секако, има одредени области од неговата игра што треба да ги подобри, но тешко е да го оставиме настрана, бидејќи е меѓу најдобрите. Кога играме без Арда, ја чувствуваме неговата отсутност“, изјави селекторот на Турција.
Турција, која стигна до полуфиналето на ЕВРО 2008, пристигна во Германија со оптимизам дека повторно ќе стигне далеку. Но, по победата над Грузија со 3-1, турските фудбалери беа поразени со 3-0 од Португалија и тешко победија против Чешка со 2-1 во групната фаза.
Турскиот дефанзивец Мерт Мулдур е оптимист дека тимот ќе биде поддржан од голема публика вечерва.
„Во претходните натпревари бевме многу силно поддржани од нашите приврзаници. Се надеваме дека ќе биде исто и сега и ќе ги доживееме истите емоции“, коментира тој.
