Макфудбал во Вадуц,
Фудбалската репрезентација на Македонија со триумф (0-3) против Лихтенштајн во Вадуц го отвори новиот квалификациски циклус за СП 2026. Доминација на терен, три гола за потврда на поголемата класа и оддадена почит на настраданите во огромната трагедија во Кочани.
Селекторот Благоја Милевски е задоволен од триумфот и по кусата анализа вели дека сега мислите веднаш се насочуваат кон дуелот против Велс во Скопје во вторник.
„Честитките за моите фудбалери поради околностите и трагедијата во Кочани што смогнаа сили да го изнесат натпреварот на најдобар можен начин. Очекувавме Лихтенштајн да биде дефанзивен и компактен, ги анализиравме, максимално се подготвивме и физички и тактички и ментално. Важни ни беа трите бода, но и менталната подготвеност, сега се фокусираме на мечот со Велс, веднаш размислуваме за следниот натпревар. Тоа е веројатно најтешкиот натпревар, и поради силата на противникот, и поради ситуацијата. Имаме интересна група, секоја селекција има свои шанси да напредува. Дуелот со Велс ќе биде сосема поинаков и верувам дека ќе одговориме и физички и психички“, изјави селекторот Благоја Милевски.
