Раководството на Милан одлучи да му “покаже заби” на Мино Раиола, со тоа што веќе ја доведе замената за голманот Џанлуиџи Донарума. Договорот на италијанскиот репрезентативец истекува на 30 јуни, а тој сè уште ја нема прифатено понудата од 8 милиони евра годишно за продолжување на тековниот договор.
Како резултат на ова, само 24 часа по освојувањето на титулата во Франција, Мајк Мењон веќе се наоѓа во Милано и денеска ќе ги помине своите лекарски прегледи со “росонерите”. Претходно, италијанските медиуми објавија дека францускиот голман постигнал договор со новиот клуб.
Од неговата продажба, новиот шампион на Франција, Лил ќе инкасира 15 милиони евра, а 25-годишникот кој беше прогласен за голман на сезоната во Лига 1, ќе потпише петгодишен договор вреден 3 милиони евра по сезона. Што се однесува до Донарума, за неговиот потпис како слободен агент конкурираат Јувентус и Барселона.
