МАКФУДБАЛ ТРЕНЕР НА ПОЛУСЕЗОНАТА: Гоце Седлоски (Шкупи)

Дојде на Чаир и веднаш наметна шампионски шарм. Го презеде Шкупи, успеа да го реконструира тимот, го убеди раководството на клубот од Чаир да донесе неколку големи засилувања, а тој успеа да ги вклопи во победнички тим.

Епилогот е очигледен, Шкупи е лидер на табелата по првиот дел од првенството, има седум бода предност пред првиот конкурент Академија Пандев и осум позитива во однос на актуелниот шампион Шкендија.

Цврст и стабилен во донесувањето на одлуките, го има неопходното искуство стекнато од интернационалната фудбалска кариера, а одлично го познава и македонскиот шампионат и што е потребно за да се биде првак од периодот во Вардар. Сето ова, Гоце Седлоски одново успешно го прави и во Шкупи.

Ќе рече некој, лесно е кога клубот ти ги носи потребните засилувања, но треба и да те одберат за носител на проектот.

Кај тренерите нема многу простор за импровизации, тој што ги има најдобрите резултати, најчесто е и најдобриот за изминатиот период.

Гоце Седлоски е МАКФУДБАЛ ТРЕНЕР НА ПОЛУСЕЗОНАТА во Првата фудбалска лига. Тој го предводи МАКФУДБАЛ ТИМОТ НА ПОЛУСЕЗОНАТА.