Македонија доминантна против Малта, Елмас и Манев донесоа триумф (ВИДЕО)

МАКФУДБАЛ во Малта,
Никола Ѓуровски

Фудбалската репрезентација на Македонија забележа победа над Малта (0-2) на гости во Ла Валета и се враќа во игра за бараж за ЕВРО 2024. Тоа е втор триумф за македонскиот национален тим и се надоврза на ремито (1-1) против Италија во Скопје. Стрелци на головите за Македонија беа Елиф Елмас во петтата минута и Јован Манев во 41.минута од мечот.

Македонската репрезентација имаше апсолутна контрола на сите случувања на теренот, како и на резултатот на дуелот во Ла Валета. Првпат Македонија играше со црни дресови, а првпат стартер беше играчот од средниот ред Исник Алими.

Елиф Елмас уште во петтата минута донесе водство за Македонија. Тој се одлучи на удар откосо од левата страна и погоди во спротивниот агол. Малта делуваше безопасно, а капитенот Енис Барди се закани од слободен удар, но неговиот шут голманот Хенри Бонело го скроти на гол-линијата.

Пред крајот на првиот дел, во 41.минута, Барди изведе корнер, а Јован Манев се најде на вистинското место во петерецот и со удар со глава ја затресе мрежата на Малта. Тоа е негов дебитантски погодок во сениорскиот национален тим.

Во 67.минута, по една одлична акција во која учествуваше речиси целиот тим, Алиоски шутираше откосо од левата страна и го погоди дирекот од голот на Малта.

Во финишот од мечот, повреда заработи дефанзивецот Ѓоко Зајков, кој на носилки беше изнесен од теренот, а на негово место во игра влезе Никола Серафимов.