Пари Сен Жермен официјално го претстави својот нов тренер, а тоа е Шпанецот Луис Енрике. Презентацијата беше одложена за околу три часа бидејќи летот на претседателот на клубот Насер Ал-Келаифи доцнеше. Парижаните освен со нов тренер се пофалија и со својот нов тренинг комплекс во Поаси.
Ал-Келаифи пред да го претстави Луис Енрике му се заблагодари на поранешниот тренер Кристоф Галтие, кој се соочува со тужба за расизам. Претседателот потоа му се заблагодари на Лионел Меси, опишувајќи го како „најдобриот играч на светот“, а искажа благодарност и до Серхио Рамос, кој исто така го напушти клубот ова лето.
Луис Енрике ја отвори прес-конференцијата со изјава на француски јазик.
„Ви благодарам за довербата што ми ја укажавте“, изјави Шпанецот.
Тој додаде дека една од неговите цели е тимот да игра напаѓачки фудбал и да ги радува навивачите.
„Сакам да изградам тим кој ќе го направи тоа и ја имам поддршката од клубот“, дополни Луис Енрике.
