Тренерот на Пари Сен Жермен, Луис Енрике, беше воодушевен по победата на пенали против Ливерпул во осминафиналето од Лигата на шампионите. Тој го пофали својот тим за покажаниот карактер на „Енфилд“ и за пласманот во следната фаза на турнирот.
„Сега тие играа подобро од нас, но мислам дека и мојот тим покажа одлично лице и голем карактер на ‘Енфилд’, кој е специјален стадион. Се обидовме да го дадеме најдоброто од себе, но беше тешко, бидејќи тие играа со огромен интензитет. Двата тима заслужуваа да продолжат понатаму. Карактерот и борбеноста беа клучни, особено при пеналите“, изјави Луис Енрике.
„Мислам дека покажавме каков тим сме. Кога ждребот одреди ПСЖ да игра против Ливерпул, сметам дека и двајцата тренери си мислевме истото – ова ќе биде еден од најдобрите дуели за гледање во Европа. Мислам дека двата тима беа фантастични“, продолжи Шпанецот.
„Не станува збор само за континуитет. Требаше да бидеме перфектни во клучните моменти. Многу страдавме по поразот во Париз, но таков е фудбалот. Понекогаш е неправеден. Сега ние ја имавме среќата, тие двапати погодија статива. Џанлуиџи Донарума беше како Алисон во првиот натпревар. Среќни и самоуверени сме што продолжуваме во следната фаза“, заврши стратегот на ПСЖ.
