Пари Сен Жермен има потреба само од бод на натпреварот со Анже в сабота, за да ја освои шампионската титула на Франција уште во 28. коло на првенството. Тоа ќе биде 13-та титула за ПСЖ. Тимот на Луис Енрике беше блиску до освојување уште минатиот викенд, кога победи убедливо против Сент Етјен (6-1), а Олимпик Марсеј загуби, но Монако ја одложи прославата со својата победа над Ница.
„Секако дека ќе ја славиме титулата со нашите навивачи, ако победиме утре. Ова е голема мотивација“, изјави тренерот Луис Енрике.
„Виртуелно веќе неколку недели сме шампиони, но сакаме да подобриме уште рекорди“, додаде Шпанецот.
Ова ќе биде и четврта последователна титула за парижаните, како и 11-та од доаѓањето на катарскиот фонд во 2011, а тимот ќе има три титули повеќе од Сент Етјен и четири повеќе од Олимпик Марсеј.
Во новиот формат на првенството со 18 екипи, веќе е невозможно да го подобрат својот рекорд по освоени поени – 96, постигнати во сезоната 2015/16 во формат со 20 тимови. Сепак, ПСЖ сигурно ќе го подобри своето постигнување од 76 бода од минатата година, веќе ги надминува по поени Нант (шампион со 68 во сезоната 2000-01), Монако со 65 и Лион со 66, а има уште седум кола до крајот на првенството.
ПСЖ може да стане и единствениот француски тим кој ќе ја заврши целата сезона без пораз.
„Има рекорди кои не ми беа интересни досега. Но отсега натаму не мислам дека има подобра мотивација за нас од тоа да се обидеме да останеме непоразени во целиот шампионат“, потенцираше Луис Енрике.
Со титулата и пласманот во финалето на Купот на Франција, ПСЖ може да се фокусира на подготовките за четвртфиналето против Астон Вила во Лигата на шампионите на 9. и 15. април.
„Ќе ги искористиме последните осум натпревари за да подготвиме нови цели, да бидеме конкурентни на противниците со почит и смиреност. Мора да бидеме подготвени за трите месеци кои остануваат. Има Куп на Франција и Лига на шампиони, сакаме да стигнеме до крајот“, додаде шпанскиот стручњак.
