Реал Мадрид го пречекува Ливерпул во реваншот од осминафиналето на Лигата на шампионите. Избраниците на Карло Анчелоти имаат комфорно водство откако одиграа фантастичен натпревар на „Енфилд“, каде што победија со 5-2, и покрај двата брзи гола на англискиот клуб. „Кралевите“ веќе некое време се ноќна мора за Ливерпул.
Тие победија на шест од последните седум натпревари меѓу двата тима, а два од нив беа во финалето на најпрестижниот клупско натпреварување.
Сепак, Реал се мачеше по победата на „Енфилд“, ремизирајќи двапати во Ла Лига, а загуби со 1-0 од Барселона во Купот на Кралот. Тимот се врати на победите пред неколку дена кога триумфира со 3-1 против Еспањол.
„Кралскиот клуб“ се пласирал понатаму во 26 од 27 наврати кога победил на првиот натпревар на гостински терен. Единствен исклучок е испаѓањето од Ајакс во 2019 година.
Тимот на Карло Анчелоти нема примено повеќе од еден гол на домашен натпревар од април минатата година, кога загуби со 2-3 од Челси, но сепак ги елиминираше лондончани.
По поразот од Реал, Ливерпул ремизираше 0-0 со Кристал Палас пред да го победи Вулверхемптон и да го декласира Манчестер Јунајтед со 7-0. Сепак, по големиот успех над „црвените ѓаволи“ следуваше пораз од Бурнмут, како последен меч во Премиер – лигата пред гостувањето во Мадрид.
Овој неуспех ги искомпликува шансите на „црвените“ за пласман во Топ 4 кој носи и учество во Лигата на шампионите следната сезона.
