Кризата на Ливерпул станува сè подлабока. По европската магија во Лигата на шампионите, каде блеснаа против Ајнтрахт Франкфурт, „црвените“ вечерва се приземјија тешко во Премиер – лигата.
Брентфорд на свој терен покажа храброст, карактер и смелост — и го победи шампионот со 3-2.
Веќе по пет минути беше јасно дека ова нема да биде лесна вечер за избраниците на Арне Слот. Данго Оутара ја запали публиката со рано водство, а во самиот финиш од првото полувреме Кевин Шаде го удвои резултатот и го натера Ливерпул да тргне во потера.
Сепак, „црвените“ најдоа зрак надеж кога младиот Милош Керкез погоди во последните секунди од првиот дел. Но, наместо пресврт, следуваше уште еден удар – Игор Тијаго беше сигурен од пенал во 60. минута и ги замолкна гостинските навивачи.
Мохамед Салах во 89. минута само го ублажи поразот, но впечатокот остана: Ливерпул делува без идеја и без енергија. Брентфорд, пак, го одигра совршениот натпревар – борбен, паметен и смел.
Падот на шампионот продолжува, а притисокот врз Арне Слот станува сè поголем.
