Легендарниот швајцарски ас Адмир Мехмеди ќе биде нов спортски директор на Шкендија?

Во Шкендија најверојатно ќе следи нова комплетна реконструкција, откако тимот доживеа фијаско во Европа и беше елиминиран уште во првото квалификациско коло од Конференциската лига. Според информациите, нов спортски директор на клубот треба да биде легендарниот швајцарски репрезентативец Адмир Мехмеди. Тој е роден во Гостивар и за првпат би можел да дојде да работи во македонскиот фудбал.

Оваа информација доаѓа од швајцарскиот медиум „Блик“.

Шкендија беше елиминирана од ерменскиот претставник Ноа, загуби на двата меча, а тоа јасно покажува дека и покрај сериозните вложувања коцките во тимот, а и на раководните позиции во клубот, не се наместени како што треба.

Токму тоа веројатно ќе треба да биде задачата што Адмир Мехмеди ќе ја добие од „Еколог“.

Тој во кариерата беше дел од Баер Леверкузен, Фрајбург и Волфсбург во Бундеслигата, а играше и за Динамо Киев и за Цирих. Откако ја заврши активната кариера, Адмир Мехмеди работеше како спортски директор на швајцарскиот клуб Шахфаузен.